Nodyn atgoffa: Bydd unrhyw gofrestriadau neu ymholiadau a wneir ar ôl dydd Gwener 20 Rhagfyr yn cael eu prosesu unwaith y bydd y Coleg wedi ailagor ar ddydd Llun 6 Ionawr. Diolch am eich dealltwriaeth.
Croeso i Goleg Gŵyr Abertawe
Y Coleg Safon Uwch arweiniol yng Nghymru
Mae Coleg Gŵyr Abertawe yn un o'r colegau sy'n perfformio orau yn y DU. Lleolir y Coleg yn yr ardal ddynodedig gyntaf o harddwch naturiol eithriadol. Rydym yn enwog am ein rhaglen Safon Uwch, gyda chanlyniadau a chyfraddau dilyniant rhagorol i brifysgolion gorau'r DU.
Ymgeisiwch nawr - Lawrlwytho ffurflen gais (PDF)
Dwi’n mwynhau’r cwrs a’r awyrgylch yn fawr iawn yng Ngholeg Gŵyr Abertawe. Mae’r Swyddfa Ryngwladol yn gefnogol iawn ac mae wedi fy helpu i benderfynu newid fy nghwrs o Safon Uwch i BTEC. Mae’r cyfleusterau yn wych ac mae’r cymorth ar gael yn rhwydd pan fydd ei angen arnoch. Mae Coleg Gŵyr Abertawe yn fy helpu i ddilyn fy mreuddwyd o fod yn fecanydd chwaraeon moduro.
Mae wedi bod yn brofiad bendigedig. Dwi wedi cael llawer o gymorth gyda fy nghais i’r brifysgol, gan gynnwys paratoi ar gyfer profion gallu a chyfweliadau. A bod yn onest, dwi ddim yn credu y byddwn i wedi cael fy nerbyn gan Brifysgol Caergrawnt heb y gefnogaeth a’r arweiniad gwych ces i gan staff Coleg Gŵyr Abertawe."
Mae Coleg Gŵyr Abertawe wedi bod yn brofiad gwych. Dwi wedi cwrdd â phobl fydd yn ffrindiau am weddill fy oes ac mae’r athrawon yn hynod wybodus. Maen nhw bob amser yn ceisio datblygu ein diddordeb yn ein pynciau sy’n mynd y tu hwnt i gyfyngiadau’r gwerslyfr.
Mae Coleg Gŵyr Abertawe yn Goleg rhagorol gyda chymorth gwych i fyfyrwyr. Darganfyddais i fy niddordeb mewn ieithyddiaeth trwy raglen Rhydgrawnt ac ers hynny dwi wedi cael cynnig lle i astudio’r pwnc ym Mhrifysgol Caergrawnt.
Dwi wedi bod yng Ngholeg Gŵyr Abertawe ers bron dwy flynedd bellach ac wedi mwynhau fy amser yma yn fawr. Mae’r Coleg yn llawn hwyl a chyffro! Roeddwn i’n gallu cwrdd â llawer o ffrindiau newydd ac mae pob darlithydd yn garedig iawn a bob amser yn hapus i helpu. Dwi bob amser yn mwynhau mynd i’m darlithoedd gan fy mod yn hoffi dysgu rhagor am fy hoff bynciau.
Mae’r ddwy flynedd yn astudio yng Ngholeg Gŵyr Abertawe wedi bod yn anhygoel. Gall myfyrwyr ddewis o blith amrywiaeth eang o bynciau. O ran myfyrwyr rhyngwladol, mae’r swyddfa ryngwladol bob amser yn garedig ac yn barod i helpu ac roedd hyn yn ei gwneud hi’n hawdd i mi addasu i fywyd yn Abertawe. Mae Abertawe yn ddinas heddychlon wedi’i lleoli ger y traeth, ac yn fy marn i mae’n un o’r lleoedd mwyaf addas i gael profiad astudio.
Mae’r tîm Rhyngwladol yn hyfryd ac roedden nhw wedi trefnu teithiau i ddinasoedd hardd yn y DU fel Caergrawnt a Rhydychen. Roedd fy nghartref Homestay i yn berffaith ac roedd fy ngwesteiwr gofalgar wedi gwneud fy amser i yn y DU yn hapus. Mae Abertawe yn ddinas wych gyda llawer o fwytai gwych ac roedd yn bleser cwrdd â phobl o bob cwr o’r byd.
Roedd fy nghyfnod i yng Ngholeg Gŵyr Abertawe yn wych. Roedd yr athrawon mor gymwynasgar ac roedden nhw wedi fy helpu i ennill y graddau oedd eu hangen arna i i fynd i’m prifysgol dewis cyntaf. Hefyd roedd y swyddfa Ryngwladol wedi rhoi llawer o gefnogaeth i mi ac roedd hyn wedi fy helpu i ymgartrefu yn Abertawe yn gyflym iawn. Roedd wedi rhoi hyder i mi ganolbwyntio ar fy astudiaethau hefyd. Byddwn i’n argymell y Coleg hwn yn fawr!
Mae fy mhrofiad wedi bod yn bleserus iawn. Mae’r addysgu wedi bod yn effeithiol iawn ac wedi fy helpu i a fy nghyfoedion i sicrhau canlyniadau academaidd anhygoel. Mae cyfleusterau’r Coleg hefyd yn wych ac wedi caniatáu i mi gyrraedd fy mhotensial academaidd llawnaf. Yn ogystal, fyddwn i ddim wedi gallu cael cynigion gan brifysgolion gorau’r byd heb y cymorth rhagorol a ddarperir gan y rhaglen HE+ a’i threfnwyr Felicity Padley a Neris Morris.
Mae’n hawdd siarad â’m darlithwyr ac maen nhw i gyd yn barod i helpu, hebddyn nhw fyddwn i ddim wedi symud ymlaen mor dda yn academaidd. Mae aelodau staff y swyddfa Ryngwladol hefyd yn gyfeillgar ac wedi rhoi llawer o gymorth i mi. Yn wir, mae byw yn Abertawe ac astudio mewn Coleg mor anhygoel yn brofiad bythgofiadwy.
Academi Saesneg
Mae’r cwrs hwn yn cynnig mynediad ar lefelau cymhwysedd amrywiol ac mae’n rhoi cyfle i fyfyrwyr ehangu eu sgiliau siarad, gwrando, darllen ac ysgrifennu. Addysgir Saesneg defnyddiol mewn sefyllfaoedd realistig fel y gall myfyrwyr ddysgu ac ymarfer iaith ym mywyd pob dydd. Addysgir y cwrs o ddydd Llun i ddydd Gwener am 16 awr yr wythnos.
Gwneir asesiadau pan fydd myfyrwyr wedi cyrraedd y safonau gofynnol i gyflawni’r modiwlau City & Guilds mewn darllen, ysgrifennu, siarad a gwrando. Gall myfyrwyr wneud cais am gyrsiau Safon Uwch neu Lefel Uwch yng Ngholeg Gŵyr Abertawe ar ôl iddynt gyrraedd y lefel cymhwysedd briodol ar gyfer y rhaglen astudio o’u dewis.
Bydd y cwrs hwn yn datblygu perfformiad myfyrwyr ar draws yr holl sgiliau iaith Saesneg allweddol er mwyn sicrhau’r llwyddiant mwyaf posibl mewn arholiadau IELTS. Mae ei gynnwys diddorol yn darparu digon o ymarfer mewn technegau astudio sylfaenol ar gyfer pontio i ddysgu Safon Uwch. Mae myfyrwyr yn cael cyfle i dreialu pynciau o’u diddordeb ac elwa ar gyfeillion Coleg. Mae gweithgareddau cymdeithasol a diwylliannol cynhwysol yn ategu pynciau gwersi ac maen nhw’n codi cwr y llen ar fywyd myfyrwyr yn y DU.
Mae gan y cwrs opsiynau sy’n para tri, chwe neu naw mis, yn dibynnu ar ofynion dysgu unigol. Oriau ystafell ddosbarth rheolaidd gyda gweithgareddau allgyrsiol ychwanegol. Mae myfyrwyr yn sicr o gael mynediad i raglenni Safon Uwch yng Ngholeg Gŵyr Abertawe pan fyddan nhw wedi cyrraedd y safon IELTS ofynnol.
Mae Saesneg Academaidd yn gwrs cwricwlwm ychwanegol sydd ar gael i fyfyrwyr Safon Uwch Coleg Gŵyr Abertawe a fyddai’n elwa ar gymorth ieithyddol. Mae arweinydd y cwrs yn cyd-gysylltu’n agos â staff y cwricwlwm i nodi meysydd datblygu penodol myfyrwyr. Mae’r dosbarthiadau’n cynnwys sesiynau adolygu un-i-un yn ogystal â thasgau dilyniant iaith generig. Mae ymarfer cynhwysfawr yn helpu myfyrwyr i lwyddo yn eu hastudiaethau academaidd a pharatoi ar gyfer IELTS.
Mae’r cwrs yn rhedeg unwaith yr wythnos am 2.5 awr trwy gydol y tymor a disgwylir i fyfyrwyr gwblhau gweithgareddau ac aseiniadau hunanddysgu a roddir iddyn nhw. Cynigir cymorth ychwanegol trwy system Bwcio Llyfrgellydd Coleg, lle mae cymorth un-i-un ar gael ar gyfer gwaith ymchwil pwnc a gwaith ieithyddol.
Bwriedir y rhaglen flwyddyn hon ar gyfer pobl ifanc 17-19 oed a hoffai symud ymlaen i brifysgol yn y DU. Bydd myfyrwyr yn dilyn Rhaglen Mynediad Lefel 3 sydd ar gael mewn amrywiaeth o bynciau gan gynnwys Busnes, Cyfrifiadura Cymhwysol, y Dyniaethau, y Gyfraith a Gwyddoniaeth. Yn ogystal â hyn, bydd myfyrwyr yn derbyn hyfforddiant Saesneg wedi’i deilwra i anghenion yr unigolyn, gan sicrhau bod myfyrwyr yn cyflawni’r lefel ofynnol o Saesneg er mwyn symud ymlaen yn llwyddiannus i’r brifysgol.
Ni fydd myfyrwyr sy’n mynychu’r rhaglen hon ynghlwm wrth brifysgol benodol. Yn lle, rhoddir arweiniad ardderchog i bob myfyriwr ar yrfaoedd i’w galluogi i ddewis y brifysgol iawn sy’n gweddu i’w diddordebau penodol. Mae’r rhan fwyaf o brifysgolion yn y DU yn derbyn myfyrwyr ein Rhaglen Sylfaen Ryngwladol, ond bydd eu derbyn yn dibynnu ar y canlyniad terfynol, lefel iaith Saesneg a chais UCAS. Yn ddiweddar, mae myfyrwyr wedi symud ymlaen i Brifysgol Caerdydd, Prifysgol Abertawe a Phrifysgol Bangor, i enwi ond ychydig.
I fod yn gymwys, dylai fod gan fyfyrwyr o leiaf 5.5 IELTS.
Rhaglen gymdeithasol
Coleg Eglwys Crist, Rhydychen
Cafodd ein myfyrwyr rhyngwladol UG ac A2 amser i edmygu Coleg Eglwys Crist, Rhydychen ar daith amlgyfrwng.
Galluogodd hyn i fyfyrwyr gael cip ar diroedd y coleg ac ymweld â’r coleg ei hun. Treuliwyd amser hefyd yn yr Ysgol Diwinyddiaeth a Radcliffe Camera, sy’n agos i’w gilydd.
Mae’r myfyrwyr presennol yn dod o wledydd megis Botswana, Tsieina, Hong Kong, Yr Eidal, Taiwan, Gwlad Thai a Fietnam.
Rhosili
Fe aeth ein carfan ddiweddaraf o fyfyrwyr rhyngwladol i Rhosili ym Mhenrhyn godidog y Gŵyr i weld tirweddau ysbrydoledig ac arfordiroedd swynol.
O’r man hudolus hwn, gallwch weld Pen Pyrrod a Bae Rhosili, sy’n cael eu hystyried yn rhai o draethau gorau Ewrop.
Gwledd y Gaeaf
I ddathlu diwedd y tymor cyntaf, treuliodd ein myfyrwyr rhyngwladol amser gyda’u Cyfoedion rhyngwladol yng Ngwledd y Gaeaf Abertawe
Mae’r digwyddiad yn cael ei gynnal bob Nadolig ac mae’n cynnig cyfle i ymwelwyr fwyta bwyd cynnes, mynd ar reidiau cyffrous a defnyddio’r llawr sglefrio. Mae’n gyfle i gael saib haeddiannol o astudio yn ystod tymor y gaeaf.
Myfyrwyr lleol yw’r Cyfeillion rhyngwladol sy’n gweithio gyda’n myfyrwyr rhyngwladol i’w helpu i addasu i ddiwylliannau lleol a gwella eu Saesneg.
Y Cilgant Brenhinol, Caerfaddon
Mae’r myfyrwyr rhyngwladol yn treulio amser yn edmygu un o dirnodau pensaernïol eiconig Caerfaddon. Mae’r golygfeydd o’r Cilgant Brenhinol i lawr i Barc Brenhinol Victoria yn drawiadol iawn gyda’r awyr las uwchben.
Roedd atyniadau eraill yn ystod y daith yn cynnwys y Baddonau Rhufeinig a’r Farchnad Nadolig.
Yn y llun yma mae myfyrwyr o Bahrain, tir mawr Tsieina, Hong Kong, Corea a Singapôr.
Abaty Caerfaddon a’r Baddonau Rhufeinig, Caerfaddon
Cerdded o gwmpas teras y to yn ystod ymweliad â’r Baddonau Rhufeinig, Caerfaddon. Myfyrwyr yn mwynhau edrych ar Abaty Caerfaddon a chofadeiladau enwog eraill yn y ddinas hanesyddol hyfryd hon.
Yn y llun mae Vincy, Nettie ac Iris sydd i gyd yn dod o Tsieina.
Ble mae Abertawe?
Amserau gyrru i Abertawe
3 awr o London 
2¾ awr o Birmingham 
1½ awr o Bristol 
4 awr o Manchester 
Gyda’i gysylltiadau â’r rhwydwaith cludiant ehangach, mae Abertawe mewn lleoliad strategol ar gyfer mynediad o’r DU, Ewrop a thu hwnt.
Ar y Ffyrdd
Mae traffordd yr M4 yn cysylltu Llundain ag Abertawe ac mae’n 3 awr o daith. Mae’r cwmni bws cenedlaethol yn gweithredu gwasanaeth uniongyrchol bob awr o Abertawe i holl feysydd awyr rhyngwladol Llundain.
Ar y Trên
Mae trenau uniongyrchol ar gael bob awr o Abertawe i Lundain ac mae’n 3 awr o daith.
Mewn Awyren
Mae’n cymryd ychydig o dan 3 awr i yrru o Faes Awyr Heathrow Llundain i Abertawe. Mae’n cymryd 1.5 awr i yrru o Faes Awyr Rhyngwladol Bryste i Abertawe. Mae’n cymryd tua awr i yrru o Faes Awyr Caerdydd i Abertawe.