Newyddion y Coleg

Caergrawnt yn paratoi glaslanciau De Cymru ar gyfer llwyddiant

Mae academydd o Brifysgol Caergrawnt, sy’n hanu o Abertawe yn wreiddiol, newydd gwblhau taith wythnos o hyd yn Ne Cymru i ysbrydoli 875 o bobl yn eu harddegau i fynd i’r prifysgolion gorau.

CGA yn ennill teitl Coleg Cyfrifeg y Flwyddyn (Sector Cyhoeddus)

Mae Coleg Gŵyr Abertawe wedi ennill Coleg Cyfrifeg y Flwyddyn (Sector Cyhoeddus) yn seremoni wobrwyo nodedig PQ Magazine, cyhoeddiad ar gyfer cyfrifwyr rhannol gymwysedig.

"Rydyn ni wrth ein bodd i ennill y teitl ac yn hapus iawn i’w rannu gyda’r tîm Cyfrifeg ym Mhrifysgol De Cymru, Casnewydd – roedd hi’n noson wych i Gymru!" dywedodd yr Arweinydd Cwricwlwm Paul Sizer.

Cafodd y coleg ei enwebu am gyfanswm o bedair gwobr – Coleg Cyfrifeg y Flwyddyn (Sector Cyhoeddus), Arloesi ym Maes Cyfrifeg, Tîm Cyfrifeg y Flwyddyn a PQ y Flwyddyn (i’r fyfyrwraig Kate Reed).

Bariton 'Syniadau Mawr' yn ymweld â myfyrwyr Harddwch

Roedd y Model Rôl Syniadau Mawr a’r bariton amldalentog o Gymru Mark Llewellyn Evans wedi cynnal diwrnod o weithdai yn ddiweddar yng Nghanolfan Broadway.

“Roedd hyn yn gyfle gwych i’r therapyddion harddwch newydd gael cipolwg ar y gyrfaoedd y gallen nhw eu dilyn yn y diwydiant ffilmiau a cherddoriaeth,” dywedodd Swyddog Menter y coleg Lucy Turtle, a drefnodd y digwyddiad. 

Llongyfarchiadau i Kaitlyn am lwyddiant Salon Cymru

Mae’r fyfyrwraig harddwch Kaitlyn Hole, sy’n astudio’r cwrs rhan-amser Tystysgrif mewn Colur Cosmetig yng Nghanolfan Broadway wedi dod yn ail yng nghystadleuaeth flynyddol Salon Cymru (categori Lefel 2 Colur).

"Dw i wrth fy modd gyda’r canlyniad ac yn falch dros Kaitlyn," dywedodd y darlithydd Cathy Mitchell. "Roedd yr holl fyfyrwyr a gymerodd ran yn y gystadleuaeth yn wych – o ran eu gwaith caled cyn y digwyddiad a’r gwaith ardderchog a wnaethon nhw ar y diwrnod."

Diolch i Hyfforddiant ISA am y llun.

Merched Cymru yn Gwneud Hanes yng Nghampau Chwaraeon Colegau’r DU

Cyrhaeddodd myfyrwyr colegau addysg bellach Cymru uchelfannau newydd gan dorri recordiau chwaraeon tîm merched ym Mhencampwriaethau Cenedlaethol Chwaraeon yr AoC dros y penwythnos diwethaf yn Newcastle.

Enillodd tri o dimau merched Colegau Cymru, a fu’n cystadlu yn erbyn 11 o sgwadiau rhanbarthol a chenedlaethol o bob cwr o'r DU, safle ar y podiwm yng nghystadlaethau rhuban glas rygbi, pêl-rwyd a hoci.

Coleg Gŵyr Abertawe am benodi aelod Bwrdd newydd

Mae Coleg Gŵyr Abertawe yn cynnig ystod eang o gyrsiau academaidd a galwedigaethol amser llawn a rhan-amser ar ddau brif safle a dau safle llai yn Abertawe a Gorseinon. Mae myfyrwyr yn cael lefelau uchel o lwyddiant academaidd, gyda dros 900 o fyfyrwyr yn symud ymlaen i'r brifysgol bob blwyddyn, gan gynnwys, yn 2014, naw i brifysgolion Rhydychen a Chaergrawnt. Mae'r Coleg yn cyflogi bron 1000 o staff ac mae ganddo drosiant o £37m.

Cewri diwydiant i gynorthwyo myfyrwyr gyda phrosiect peirianneg

Mae myfyrwyr Technoleg Ddigidol ar fin elwa ar y cysylltiadau parhaus y mae Coleg Gŵyr Abertawe wedi’u creu â’r cewri gweithgynhyrchu Tongfang Global (THTF).

Am yr ail flwyddyn yn olynol mae’r cwmni o Bort Talbot wedi cytuno i gynorthwyo myfyrwyr wrth iddyn nhw baratoi i ddylunio ac adeiladu’r cymhorthion gweithgynhyrchu Teledu Clyfar diweddaraf ar gyfer eu prosiect Cynllun Addysg Beirianneg Cymru.

Coleg yn cael ei enwebu am wobr tennis

Mae Coleg Gŵyr Abertawe wedi cael ei roi ar y rhestr fer am wobr gan Gymdeithas Tennis Lawnt (LTA) Cymru.

Mae adran Chwaraeon y coleg yn un o dri sydd wedi cyrraedd y rownd derfynol yn y categori Addysg yng Ngwobrau Tennis Cymru 2015, a fydd yn cael eu cynnal yng Ngholeg Brenhinol Cerdd a Drama Cymru ar 20 Chwefror. Mae hyn yn cydnabod yr amrywiaeth eang o weithgareddau tennis y mae’r coleg yn eu trefnu drwy gydol y flwyddyn fel rhan o’r cwricwlwm ehangach.

Myfyrwyr yn cael blas ar fyd tecstilau

Bu criw o fyfyrwyr Celf a Dylunio, Llwyn y Bryn yn ddigon ffodus i gael ymweld â melin wlân Melin Tregwynt mewn rhan anghysbell o arfordir Sir Benfro. Trefnwyd y daith gan Anna Davies, Hyrwyddwr Dwyieithrwydd a Lucy Turtle, Swyddog Mentergarwch Coleg Gŵyr Abertawe.

Mae’r felin wedi bod yn nheulu Amanda ac Eifion Griffiths ers 1912 ac mae’n cyflogi dros 30 o bobl.

Sesiynau blasu Cymraeg yn y brifysgol

Yn dilyn cais llwyddiannus Coleg Gŵyr Abertawe am arian prosiect gan y Coleg Cymraeg Cenedlaethol, trefnwyd diwrnod blasu i'r myfyrwyr hynny a hoffai ddilyn gyrfa ym maes nyrsio neu fydwreigiaeth.