Mae Kane Morcom, sy’n astudio Peirianneg Electronig L3 yng Ngholeg Gŵyr Abertawe, yn paratoi ar gyfer taith newid bywyd mewn ymgais dewr i gynrychioli’r DU ar y llwyfan rhyngwladol yn y ‘gemau olympaidd sgiliau’ yn Tsieina.
Yn dilyn llwyddiant Kane yn ei gystadlaethau sgiliau cenedlaethol WorldSkills UK, mewn partneriaeth â Pearson, mae wedi cyhoeddi y bydd yn ymuno â’r rhaglen hyfforddi dwys 18 mis.
Bydd Kane nawr yn gobeithio cael ei ddewis i’r tîm fydd yn cynrychioli’r DU yn WorldSkills Shanghai ym mis Medi 2026.
Mae arbenigwyr ar draws y byd yn ystyried cystadleuaeth WorldSkills fel y prawf eithaf o allu cenedl i ateb anghenion sgiliau’r dyfodol. Mae cynrychiolwyr llywodraethau, addysgwyr a chyflogwyr blaenllaw o bedwar ban y byd yn bresennol yn y digwyddiad.
Mae WorldSkills UK yn defnyddio ei gyfranogiad yn y gystadleuaeth WorldSkills ryngwladol i hyrwyddo rhagoriaeth sgiliau ar draws y DU a thrwy weithio gydag addysg, diwydiant a llywodraethau’r DU, mae’n sefydlu safonau hyfforddiant o safon fyd-eang. Mae hyn yn helpu i fodloni’r galw am weithlu medrus iawn mewn sectorau allweddol gan gynnwys peirianneg, digidol, gweithgynhyrchu ac adeiladu.
Dywedodd Ben Blackledge, Prif Weithredwr, WorldSkills UK: “Llongyfarchiadau i Kane ar gael ei ddewis ar gyfer ein rhaglen hyfforddi WorldSkills Shanghai 2026. Gydag aelodau eraill ein rhaglen, bydd Kane yn datblygu’r sgiliau cywir i hyrwyddo twf busnesau ar draws ein heconomi. Mae’r ffaith bod Shanghai yn croesawu WorldSkills y flwyddyn nesaf yn darparu llwyfan gwych i ni gydweithio’n agos â Tsieina, rhywle lle rydyn ni’n gwybod bod rhagoriaeth sgiliau yn flaenoriaeth i gydweithredu, arloesi a dysgu gan y gorau yn y byd.”
“Mae Kane wedi gweithio yn anhygoel o galed ac rydyn ni i gyd mor falch ohono fe yn yr adran Beirianneg yng Ngholeg Gŵyr Abertawe,” meddai’r Arweinydd Cwricwlwm a hyfforddwr WorldSkills, Steve Williams. “Rydyn ni’n edrych ymlaen at gefnogi Kane wrth iddo wneud ei ffordd trwy’r broses hyfforddi, a fydd yn gyfle gwych iddo arddangos ei sgiliau ar lwyfan cenedlaethol a rhyngwladol.”
Dyma’r tro cyntaf i Tsieina groesawu’r digwyddiad WorldSkills nodedig, sy’n cael ei adnabod fel y ‘Gemau Olympaidd Sgiliau’. Bydd y digwyddiad yn gweld 1,500 o bobl ifanc yn teithio i Shanghai o dros 80 gwlad i gystadlu mewn disgyblaethau sgiliau technegol (o beirianneg, gweithgynhyrchu a thechnoleg i bynciau creadigol, digidol a lletygarwch) o flaen cynulleidfa o 250,000. Bydd y DU yn cystadlu mewn dros 30 o sgiliau yn WorldSkills Shanghai 2026, gan gynnwys Celf Gemau Digidol 3D, Integreiddio Systemau Robot ac Ynni Adnewyddadwy.
Pearson yw partner swyddogol Tîm y DU ar gyfer WorldSkills Shanghai, sy’n cael ei gynnal rhwng 22 a 27 Medi 2026.