BA (Anrh) Addysg, Dysgu a Datblygiad (Ychwanegol)

Nod y cwrs yw datblygu dealltwriaeth fanwl o anghenion datblygu a dysgu plant a phobl ifanc. Bydd yn eich annog i werthuso’n feirniadol effaith dysgu, datblygu a’r cwricwlwm yn ymarferol ac archwilio hon o fewn eich cyd-destun addysgol eich hun. Bydd yn eich annog i gynhyrchu dadleuon rhesymegol a dod i gasgliadau annibynnol gan ddefnyddio dadansoddiad damcaniaethol, gweithgarwch ymarferol ac ymchwil bersonol ar lefel gradd. Bydd yn rhoi ymwybyddiaeth academaidd a dealltwriaeth o blant a phobl ifanc o amrywiaeth o bersbectifau gan gynnwys athroniaethau a chredoau. Bydd yn datblygu’ch dealltwriaeth o sgiliau a phriodoleddau gan gynnwys arweinyddiaeth/rheolaeth, cyfathrebu a datrys problemau. Caiff ei addysgu trwy ddarlithoedd, seminarau, gweithdai, dysgu seiliedig ar waith, ymweliadau allanol, astudio dan gyfarwyddyd ac astudio annibynnol. Mae hwn yn gwrs rhan-amser sy’n rhedeg dros ddwy flynedd ac felly mae’n ddelfrydol i’r rhai mewn cyflogaeth neu sy’n methu ag ymrwymo i astudio amser llawn. Byddwch yn ymgymryd â chwe awr o astudio yr wythnos dros ddwy noson 6.00pm-9.00pm.